Ultima Financial Planners - News

5 Augustus 2011 

Met die onlangse aankondiging deur die Amerikaanse regering dat hulle hul skuld plafon gaan verhoog, vra baie beleggers vrae oor wat om nou te doen.

In die laatmiddag nuus, ‘n dag na die aankondiging, word vertel van hoër as normale mark aktiwiteite, beide op ons plaaslike JSE sowel as die Amerikaanse Wall straat. Die nuus is egter meer spesifiek as bloot die hoeveelheid verhandelings, dit handel oor die hoë vlak van verkoop van aandele.

In finansiële beplannings terme word na hierdie optrede verwys as ‘kudde gedrag’ (Engels – Herd behaviour). Die begrip kan in kort beskryf word as die irrasionele gedrag deur mense wat ander se gedrag navolg op grond van emosionele faktore. In hierdie geval is daar slegte nuus in die mark: die Amerikaanse regering kan nie hulle finansiële pligte nakom nie en leen nou meer geld daarvoor. Die slegte nuus maak beleggers bang om aandele in maatskappye te koop of te hou en hulle begin dan verkoop, wat baie aandele beskikbaar stel  en die verkoop pryse laat daal (vraag & aanbod). Beleggers wat die aandeelpryse sien daal wil nie verder ‘geld verloor’ nie en bied hul aandele te koop aan. Derhalwe verhoog die aanbod maar die lae vraag na aandele lei daartoe dat pryse verder daal (vir elke aandeel wat verkoop moet word, moet daar iemand aan die ander kant wees wat dit wil koop). So gaan die spiraal afwaarts.

‘n Bekende Wall straat gesegde lees: “In tye van krisis vloei geld van swak hande na sterkes.”

Wat om te doen of Nie te doen nie:

Elke persoon se omstandighede is uniek. Sonder om dus spesifieke advies aan enige iemand te gee:

·         Moenie oorhaastige besluite neem nie. 

·         Hou by jou langtermyn strategie (plan).

Ons weet dat onseker tye ons kliente se pad gaan kruis en bly daarom deurgaans verbind om relevante feite met ons kliente te deel en beleggings strategie te monitor.

Ultima se uitgangspunt is en bly “Gemoedsrus, Lewenslank.”

Nick Dekker

Beleggingskundiges is dit eens dat dit haas onmoontlik is om deur tydsberekening die markte reg te voorspel. Die artikel hieronder wat op 30 Oktober 2009 in Beeld se Sake afdeling gepubliseer is toon weereens hoe onvoorspelbaar die beleggingsmarkte kan wees en dat dit tyd in die mark  eerder as tydsberekening is wat goeie opbrengste verseker.

Beleggers het behoorlik hul bene gebreek om in die derde kwartaal uit geldmarkfondse te klim.

In die derde kwartaal het geldmarkfondse ’n netto uitvloei (beleggings minus onttrekkings) van R5,8 miljard beleef.

Dit is die grootste uitvloei in vyf jaar, volgens die vereniging vir spaar en beleggings van Suid-Afrika (Asisa).

Beleggers het die kwartaal R91 miljard in geldmarkfondse belê en R96,9 miljard onttrek.

Die bates onder bestuur in geldmarkfondse was einde September R235,9 miljard – dit is ’n derde van die totale bates onder bestuur in binnelandse fondse.

Fondsbestuurders het hul teleurstelling uitgespreek oor dié gedrag van gewone beleggers wat toon hulle reageer al weer te laat op die markte.

Die geld is verskuif na fondse met ’n blootstelling aan aandele.

Die grootste netto invloei is deur binnelandse batetoewysingfondse van R9,75 miljard verkry.

Mnr. Jeremy Gardiner, ’n direkteur van Investec Batebestuur, sê die syfers dui aan dat gewone beleggers die herstel in die aandelemarkte grootliks misgeloop het.

In die derde kwartaal is die styging in aandeelpryse voortgesit wat sewe maande gelede begin het.

Die indeks van alle aandele (Alsi) het van vroeg in Maart tot einde September met meer as 37% gestyg.

Gardiner sê dit is duidelik dat gewone beleggers in Suid-Afrika soos in ander ontwikkelende markte nie die herstel in die aandelemarkte vertrou het nie.

“Hoekom sou hulle?

“Die konsensus was per slot van sake dat dit net tydelik sou wees,” sê hy.

Volgens hom was die konsensus dat markte sowat 15% sou styg en dan weer sou val.

“Ongelukkig vir beleggers het dit nie plaasgevind nie en die meeste beleggers wag nog op die kantlyn om weer in aandele te belê.”

Hy meen die invloei wat batetoewysingsfondse getoon het, dui aan gewone beleggers beskou die huidige wisselvallige markte as te moeilike vaarwater en plaas die verantwoordelikheid in batebestuurders se hande.

Die totale bates onder bestuur in effektetrusts (ingesluit internasionale fondse) was aan die einde van die kwartaal R747 miljard.

In die afgelope jaar tot einde September is ’n netto invloei van R99 miljard in effektetrusts gesien – die tweede hoogste netto invloei oor 12 maande nóg, volgens Asisa.

Die grootste invloei nóg is in die jaar tot einde Junie vanjaar behaal, van R103 miljard.

Agtien maande gelede was beleggers eufories oor die prestasie van aandelebeleggings. Dat daar risiko aan verbonde kan wees of dat die gevaar bestaan dat die aandele kan daal, het toe geensins ‘n rol by besluitneming gespeel nie. Die situasie het mens amper aan aasvoëls by ‘n karkas laat dink.

Die res is, soos hulle sê, geskiedenis. Aandele het gesneuwel – oftewel hulle word behandel soos familielede wat skandes gemaak het en oor wie daar liewer nie gepraat word nie.

Die beleggingsomgewing het inderdaad wesenlik verander. Groot maatskappye met ‘n bewese opbrengsgeskiedenis van meer as honderd jaar bestaan skielik nie meer nie. Ander wat oorleef het, se markkapitalisasie het kommerwekkend gekrimp.

Beleggers is dus met goeie rede bevrees. Min mense het al ‘n soortgelyke ekonomiese krisis beleef. Die reddingsboeie wat deur regerings uitgegooi is om die ekonomie te stabiliseer het tot dusver min invloed gehad.

Ons eie ekonomie begin nou eers werklik die koue winde van verandering voel, terwyl kenners maan dat die ergste nog aan die kom is.

Is aandele dus waarlik dood … of is hulle nie? Alhoewel geen deurwinterde aasvoël ‘n vars karkas met rus sal laat nie, is die moontlikheid tog daar dat beleggers dalk die grootste beleggingsgeleentheid ooit deur hul vingers kan laat glip.

Alhoewel niemand waarskynlik die draaipunt van die beermark reg kan voorspel nie, is menige fondsbestuurder dit eens dat daar vele maatskappye daar buite is wat die storms suksesvol sal oorleef. Die mark het die geneigdheid om te draai terwyl die nuus op die ekonomiese front steeds ‘n baie donker prentjie skilder.

Kan dit wees dat beleggers weer onkant gevang gaan word?

Indien jy jonk is of dalk onlangs met ‘n spaarpoging begin het, kan jy vir jou ‘n stewige fondasie vir die toekoms lê deur in ‘n gefokusde aandelebeleggingsstrategie te belê. En moenie paniekerig word as daar in die toekoms weer swaar ekonomiese tye is nie. Onthou markte beweeg altyd in siklusse en deur meer te belê wanneer die markte daal, kan jy jou totale opbrengs oor tyd baie verbeter.

Indien jy reeds afgetree is en inkomste uit jou portefeulje moet onttrek, moet jy diversifiseer om negatiewe siklusse effektief teen te werk. Maak seker dat jy ‘n getoetste beleggingsstrategie het, en hou daarby oor die lang termyn.

Indien die top sake-entrepreneurs vir die langer termyn nie iets beter met hulle kapitaal kan doen as om dit in ‘n veilige bankbelegging te plaas nie, dan is aandele inderdaad dood.

Aandele is dood, lank lewe aandele!